Saturday, November 14, 2009

အငွေ့တွေနဲ့ ကိုယ်

7 comments


တကယ်တော့ ရင်ဘတ်ကြီး တစ်ခုလုံးပျောက်ရှသွားတာလား
မဖြစ်နိုင်ဘူး ...
ကျွန်တော်က နှာခေါင်းနဲ့ အသက်ရှုတဲ့လူမှမဟုတ်တာ
ရင်ဘတ်နဲ့ ရှင်သန်နေရတဲ့ကောင်ပဲ ....

ဖိစီးမှုတွေများလာတော့လည်း
တစ်ခါတစ်လေ ကျွန်တော့် ဒဏ်ခံကြိုးလေးတောင်
ယဲ့ယဲ့ ယိုင်ယိုင် ပဲ ကျန်တော့တယ် အမေ ....

ဘာပဲဖြစ်ဖြစ် ကျွန်တော် ကျောခိုင်းမသွားရက်ဘူးဗျာ
အဲဒီနေရာမှာ ကျွန်တော့် မိတ်ဆွေတွေအများကြီးရှိတယ်
ခင်ရာဆွေမျိုး ဆိုတော့လည်း
ကျွန်တော် မျက်စိမှိတ် လှည့်ထွက်သွားနိုင်ပါ့မလားဗျာ ...

တကယ်တော့
ရှောင်နေတာ မဟုတ်ရပါဘူး
မှောင်နေတာပါဗျာ
အယောင်ဆောင် အရေခြုံ
မှော်စုံနဲ့ အသက်သွင်းဖို့တော့
ရင်ဘတ်က အတင်းငြင်းတယ် ...

အသဲတွင်းက မပါပဲနဲ့
လက်ချည်းသက်သက်က လာတာကို
အနုပညာပါလို့လည်း ကျွန်တော် ခေါင်းစဉ် မတပ်ဝံ့ဘူး ....

ဘယ်အခြေအနေပဲဆိုက်ဆိုက်
ရင်ထဲမှာ သံလိုရိုက်ထားတာမို့
မိုက်မိုက်ကန်းကန်း
ပြန်နှုတ်ဖို့ လမ်းမရှိပါဘူး ....

ဒီမှာ ...
အဲဒီလေတွေ ရှုရှိုက်နေရသမျှ
ကျွန်တော့် ခန္ဓာတစ်ဝိုက်
ကဗျာတွေ အငွေ့ရိုက်နေဦးမယ် ....
အငွေ့ရိုက်နေဦးမယ်လေ ....



ဖြိုးငယ်

ဘာရယ်တော့ မဟုတ်ပါဘူး ... ကျွန်တော် ကဗျာမရေးဖြစ်တာ ကြာပါပြီ .. အခုစိတ်ထဲမှာ ဖြစ်နေတာလေးတွေကို တစ်ပုဒ် ပြန်ရေးကြည့်တာ .. လာလည်တဲ့သူတွေအားလုံးကို ကျေးဇူးတင်ပါတယ်ဗျာ




 

ရင်ထဲကပန်းတစ်ပွင့် ( သို့ ) ရင်ခွင်တံခါးက ပေါက်ကွဲသံ Copyright © 2008 Black Brown Art Template by Ipiet's Blogger Template